A Federación Veciñal, como entidade democrática e representativa, é un organismo dinámico en constante evolución e redefinición segundo a coxuntura e necesidades sociais, en base ás que cobra pleno senso.

Existen, non obstante, unha serie de logros salientables e actuacións que se encadradan nas diferentes áreas de traballo: promoción, convivencia, servizos sociais e infraestruturas.

• Promoción do Movemento Veciñal

Nesta área a Federación organiza asembleas e xuntanzas ordinarias e extraordinarias que aglutinan ao movemento veciñal para organizarse, debater temas e tomar decisións. Anualmente tamén se organizan dous encontros de especial importancia de cara á dinamización do movemento veciñal: as Xornadas Veciñais e a Grande Festa Veciñal.

As primeiras, que se levan a cabo a principios de ano, serven para poñer enriba da mesa problemáticas, debater propostas, proxectos e liñas de actuación nas diferentes áreas de traballo do movemento veciñal (infraestruturas, transporte, cultura, muller…), así como para avaliar o traballo desenvolto no exercicio anterior. A Festa Veciñal reúne a cada ano no Parque de Castrelos e chegado o verán, á todas as asociacións veciñais para dar a coñecer á cidade a súa oferta e actividade, ademais lévanse a cabo multitude de actuacións, xogos e unha chea de actividades de carácter deportivo, lúdico e cultural.

Ademáis destes eventos, a Federación en colaboración coa COGAVE, oferta un servizo de gabinete lingüístico ás entidades federadas e está a desenvolver un programa de apoio e formación contable nas diferentes asociacións.

• Convivencia Veciñal

Unha das funcións fundamentais da Federación é a de dinamizar a convivencia nos barrios e parroquias da cidade. Mediante o programa Move Vigo a FAVEC contribúe a que as asociacións veciñais compartan os seus recursos culturais movendo os grupos locais para actuar noutras asociacións; deste xeito vertébranse diferentes programas culturais que abranguen o ciclo anual completo: Nadal-Reis, Entroido, Letras Galegas, San Xoán e Outono Cultural.

Complementariamente o programa Móvete na Rúa leva ás agrupacións actuar e desenvolver os seus espectáculos no centro da cidade para lecer do público e promoción da cultura popular, das agrupacións e das mesmas asociacións. Ademáis a Federación ten unha agrupación propia integrada por máis de 40 artistas que proveñen das diferentes escolas e grupos das asociacións: Moxenas Musical Galego.

• Servizos Sociais

Froito das necesidades e demanda de servizos por parte do público final: a cidadanía, a Federación traballa por facilitar á veciñanza o acceso á vivenda de calidade a un prezo axeitado e así está a levar a cabo dúas promocións de V.P.A. (Vivendas de Protección Autonómica) unha en Navia baixo a fórmula da cooperativa e outra en Barreiro mediate a promotora Eduardo Chao S.L.U..

Ademáis dunha vogalía específica de Igualdade que organiza diferentes actividades (Xornadas das Mulleres Veciñais, Viaxe ás illas Cíes...) e dinamiza e coordina o traballo das diferentes vogalías de muller das asociacións, dende 1998 a Federación ten articulado un punto de información integral á muller: O Punto Informa, que asesora e pon á disposición das mulleres información e recursos como apoio e axuda ante os malos tratos, orientación laboral e familiar.

Sere@s na Rúa - traballo entre iguais, é outro dos programas sociais que promove esta entidade co fin de mellorar a calidade de vida das persoas máis empobrecidas e en risco de exclusión social. Diferentes subprogramas (punto de calor e café, intercambio de xiringas, reparto de preservativos, asesoramento, acompañamento, visita a chutadeiros e choupanos) son os encargados de dar forma a un programa tamén denominado entre os seus usuarios como “Sere@s na Rúa - o amor que cura”.

A FAVEC fai un labor de defensa constante dos intereses da cidadanía como consumidores, deste xeito non só denuncia e reclama unha mellor xestión e servizos para a veciñanza senón que articula mecanismos de información e presión co fin de obter beneficios para o consumidor. Algunhas campañas que a Federación está a levar a cabo son que finalmente se cobre a auga segundo consumo real, o pago por minuto nos aparcadoiros, melloras no transporte público, a optimización dos recursos existentes e a mellora da atención sanitaria. É destacable o reembolso que a concesionaria municipal de augas tivo que facer aos usuarios por cobros dunha tarifa indebida, todo grazas a un longo proceso contencioso-administrativo emprendido pola FAVEC que ao final deu a razón aos consumidores e obrigou á empresa a devolver os excecivos cobros.

Infraestruturas

O Movemento Veciñal unido na Federación ten moita máis forza para mediar, negociar e resolver problemáticas con outras entidades como o Concello e concesionarias municipais. Deste modo a Federación ten acadado un recente acordo para solucionar o problema dos Colectores Veciñais e para facilitar á vecinanza os trámites e información para pasar a I.T.E. (Inspección Técnica de Edeficacións).

A FAVEC actúa como grupo de presión con máis forza para reivindicar e obter melloras nos barrios e parroquias da cidade. Continuamente o movemento veciñal fai chegar aos medios e administracións as súas queixas e propostas de cidade canalizadas a través da Federación. Representa un paso cualitativo nesta liña de actuación a recente elaboración e tramitación dun informe conxunto que recolle as deficiencias e necesidades de todos os barrios e parroquias da cidade, no denominado Plan de Acción Veciñal (P.A.V.).