Presentación

A Asociación de Veciños de San Xoán Poulo comezou a súa andaina como tal no 1978 da man dun grupo de veciños voluntariosos e con moita capacidade de xestión de traballo. Tiñan nas súas inquedanzas un proxecto común que era o de mellorar as condicións de vida dos seus veciños tanto nas reivindicacións de melloras en infraestruturas como no eido cultural, social, deportivo..

Foron aqueles anos duros, a democracia acabada de estrear, aínda non tiña os canles suficientes para darlles saída ás demandas das asociacións veciñais, que se ían sucedendo en avalancha no Concello. A pesar desta situación estas persoas foron quen de manter vivo o movemento veciñal no barrio e acadaron melloras que hoxe estamos aproveitando todos os veciños.

Que facemos

Actuar ante as demandas prioritarias. Na asociación estamos a desenvolver un importante labor para dar resposta ás necesidades do barrio e acadar unhas melloras tan básicas como numerosas: beirarrúas, cunetas, arranxar lavadoiros, reordenar o tráfico, acometer a canalización das augas, facer un novo valo perimetral e cubrir a pista do campo de fútbol sala e novos vestiarios, ampliar e dotar de máis xogos o parque infantil, renovar o colector do saneamento do camiño da Devesa e recuar os perigosos postes de Fenosa do medio da vía pública e mellora da limpeza representan algunhas delas.

Convivencia veciñal. A asociación organiza todos os anos xornadas de convivencia veciñal nas que se reúnen xunta directiva con toda a veciñanza para pasar un bo lecer, recuperar as tradicións e poñer en contacto as xentes do barrio. Xornadas como a Sardiñada de San Xoán, na que ademais de sardiñas ofrecemos pan, viño e amenizamos con actuacións folclóricas, a exposición dos traballos feitos nos distintos cursos, o Magosto, Festa do Entroido con concurso de disfraces e actuacións, Día das Letras Galegas, excursións e Festa fin de Curso.

Deportes. Área na que a asociación funciona como dinamizadora organizando o Torneo de Cachibol, no que a asociación participa con dous equipos propios integrados por persoas maiores de 55 anos e o Torneo Agarimo de Fútbol Sala onde participa cun equipo federado.

Cursos. Ano tras ano gozamos dunha variada oferta de cursos que imos actualizamos segundo a demanda existente no barrio. Teñen lugar na actualidade os de danza moderna, traballo en coiro, tai chi, alfabetización, ximnasia, cachibol, ioga, sevillanas, palilleiras, pachtwork, pintura, labores do fogar...

Achégate e participa

Defender os intereses xerais dos socios e veciños na súa calidade de usuarios e destinatarios finais da actividade cultural, deportiva, educativa, sanitaria, social, económica, política, urbanística, medioambiental.., son algunhas das funcións que precisan que todos e todas traballemos xuntos-as dende a forza que fai a unión.

Informar e instruír en todas aquelas cuestións que afecten á veciñanza, promover cantas iniciativas conduzan a solucionar os problemas colectivos e potenciar a participación da poboación infantil, xuvenil, mulleres e dos maiores son outras das moitas cousas que estamos a facer para ti.

Precisamos da túa participación para seguir medrando e dar continuidade a este proxecto que sen dúbida representa un grande valor engadido para a mellora da calidade de vida no barrio en tódolos ámbitos