Con esta acción reivindicativa, o movemento veciñal pretende facer visíbel a maioritaria oposición social contra dos sucesivos incrementos do recibo eléctrico, producidos nos últimos anos. “O vindeiro sábado, a veciñanza temos que enviar unha mensaxe clara ao Goberno Central e ao lobby eléctrico: non admitiremos ningunha suba máis no prezo da luz” afirman.

Desde a FAVEC realizarase un importante esforzo organizativo para a difusión desta convocatoria, coa edición de cartelería e o reparto de folletos explicativos entre a veciñanza, contando coa activa implicación das 35 asociacións federadas.

Así mesmo nos próximos días a federación iniciará unha rolda de contactos con diferentes organizacións sociais (asociacións de consumidores, sindicatos…) a fin acadar o seu apoio a esta convocatoria.

Esta concentración enmárcase dentro da campaña reivindicativa que está a desenvolver o movemento veciñal, e que deu inicio o pasado martes cun apagón xeral. Desde a FAVEC advirten que “esta mobilización é a primeira pero pode non ser a última”, xa que segundo sosteñen “o que está en xogo é evitar que se prexudique ás familias traballadoras para seguir a garantir beneficios mil millonarios a grandes empresas privadas”.

A Comisión Permanente.