1. A Federación de Asociacións Veciñais “Eduardo Chao” de Vigo e as asociacións que a compoñen, en calidade de entidades de interese cidadá que lle son atribuídas polo Regulamento de Participación Cidadá de Vigo, queren manifestar o seu compromiso decidido coa sanidade pública como mecanismo de cohesión social.Este compromiso, que se ten posto de manifesto dende que se empezou a falar do Novo Hospital de Vigo, cómpre que sexa reafirmado neste momento na medida en que, pola información dispoñible, a Xunta de Galicia ten previsto revisar o Plan Director de Infraestruturas Sanitarias para Galicia e, con ilo o proxecto do citado hospital.
2. A información que se dispón sobre o modelo de xestión da sanidade pública nas Comunidades Autónomas gobernadas polo Partido Popular cáusanos unha fonda preocupación na medida en que está supondo un deterioro crecente na prestación dun servizo público básico, o que provocou recentemente a presentación no Congreso dos Deputados dunha proposición de lei ao respecto.
3. Pendentes de que se dea conta no Parlamento de Galicia do modelo de xestión e de financiamento que se ten previsto para o Novo Hospital de Vigo, o movemento veciñal de Vigo quere deixar claro por anticipado a súa postura:
   • O novo complexo hospitalario, cuxo custe ascende como mínimo a 304,4 millóns de euros tal e como se recollía no Plan director de Infraestruturas Sanitarias 2008-2013, hase de seguir realizando sobre a base da encomenda de execución de obra pública a través do SPI (Consellería de Facenda) nos Orzamentos de 2009. Isto supón que a súa execución, conservación, xestión e financiamento son completamente públicos.
   • Ha de ter integrado nun único centro as necesidades da área sanitaria de Vigo –ao igual que en Santiago ou A Coruña-, cunha soa porta de urxencias para toda a área sanitaria, cunha dotación de 1.414 camas no propio hospital –non pode haber veciños de primeira e de segunda-, e cunha dotación suficiente de profesionais e de infraestruturas hospitalarias que permita acadar unha atención sanitaria homologable á media europea.
4. Ademais, o movemento veciñal de Vigo quere deixar claro o lema da súa campaña “En Vigo non imos agardar mais”: xa está ben de que non se cumpran os prazos establecidos na execución dun proxecto vital para área metropolitana de Vigo. Unha cousa xa temos clara, as camas e os médicos non van estar dotados para 2012. Agora queremos que se acorde e se presente un calendario no que se recupere o tempo perdido e nós encargarémonos de facerlle un seguimento exhaustivo.
5. Este proceso, para que sexa coherente, ten que realizarse de xeito conxunto coa reordenación do sistema sanitario e dos puntos de atención continuada (PAC), tal e como quedaba recollido no Plan funcional do Novo Hospital de Vigo.

PROPOSTAS DE ACCIÓN

Diante de todo o exposto, o MOVEMENTO VECIÑAL DE VIGO:

1. Esixe ao goberno da actual Xunta de Galicia que defina o seu proxecto de xestión pública en relación co Novo Hospital de Vigo, abandonando calquera pretensión privatizadora da xestión dun servizo público básico para a área sanitaria do Sur de Pontevedra. Calquera proposta que diferencie o Novo Hospital de Vigo do que está operando en Santiago ou A Coruña, entenderase un agravio comparativo.
2. Comprométese a promover cantas accións sexan necesarias, en colaboración cos restantes membros da Plataforma en Defensa da Sanidade Pública de Vigo, para informar, sensibilizar e mobilizar á cidadanía da área metropolitana de Vigo.
3. Solicitarlle á Plataforma en Defensa da Sanidade Pública promover unha entrevista coa Conselleira de Sanidade para presentar, á maior brevidade, as demandas descritas e recabar os compromisos deste departamento autonómico que satisfagan estas demandas. No caso de percibir o incumprimento do acordo a) ou a falla de receptividade por parte dos responsables políticos da Xunta de Galicia ás propostas realizadas, propór accións de mobilización cidadá.
4. Dar a coñecer á cidadanía da área metropolitana a situación do Novo Hospital de Vigo en www.favec.org.

Suscribirse ao rss