A Presidenta da FAVEC, María Pérez, comparecendo diante dos medios ao remate da xuntanza con María José Bravo.

Unha delegación da Comisión Permanente da FAVEC mantivo esta mañá unha reunión coa nova Delegada Territorial da Xunta de Galicia en Vigo. O encontro, celebrado a iniciativa da Delegada, centrouse na Lei de Área Metropolitana. María José Bravo Bosch explicou de xeito pormenorizado os principais elementos da lei.

Por parte da Federación Veciñal transmitíuselle á delegada a posición do movemento veciñal en relación á área metropolitana, reiterando que para o colectivo a lei aprobada é un ‘avance moi limitado que non satisfai as necesidades da veciñanza de Vigo’.

A dirección da federación insistiu na necesidade de que a área sexa un ente útil para a veciñanza, para o que a FAVEC entende como condición indispensábel ‘o máximo consenso entre todos os actores, entre eles o Concello de Vigo’ polo que apelou á María José Bravo a que desde a Xunta se fagan todos os esforzos necesarios para viabilizar o acordo. ‘A veciñanza de Vigo demandamos unha área metropolitana útil e efectiva, esta demanda non pode ficar nun anuncio no DOG, o contrario será un gravísimo fracaso colectivo’ sinaláronlle.

Outro dos aspectos nos que a FAVEC incidiu foi que haxa un traspaso competencial e de recursos efectivo por parte de todas as administracións, especialmente no caso da Deputación Provincial, para evitar duplicidades. Lamentaron que a lei aprobada non obrigue a esa transferencia. ‘O único que garante a lei aprobada é que a veciñanza imos ter que pagar unha nova administración, que polo momento non ten ningunha competencia’ denunciaron. Por último o colectivo veciñal insistiu, máis unha vez, na prioridade de dotar a área dun servizo público de transporte metropolitano integral.

AGRADECEMENTO Á DELEGADA

A Comisión Permanente agredeceulle explicitamente á Delegada a iniciativa de celebrar este encontro e que decidise realizalo na sede da FAVEC. A reunión que se prolongou por máis de noventa minutos desenvolveuse con cordialidade e mutua receptividade. ‘Agradecemos que a Xunta, a través da súa delegada, respecte o papel institucional da federación como interlocutor do movemento veciñal de Vigo e que o faga sabendo ademais das nosas diferencias. Isto é o normal nunha democracia, que se escoite tamén a quen discrepa’ declararon.

Contidos relacionados:

1. O movemento veciñal reivindica unha área metropolitana útil e sen duplicidades para que a lei non quede en ‘papel mollado’

No día de hoxe o alcalde reuniuse con cinco asociacións veciñais da cidade para abordar a lei da área metropolitana que vén de ser aprobada polo Parlamento Galego. Desde a Federación Veciñal manifestaron respectar ‘o dereito do alcalde de manter tertulias con quen queira’ mais lémbranlle a Caballero que é a FAVEC quen representa ao conxunto das asociacións veciñais en temas de cidade. ‘Se o que quere o alcalde é coñecer a posición do movemento veciñal sobre a área metropolitana con quen se ten que reunir é coa Federación Veciñal que representa a 36 asociacións de todos os barrios e parroquias’ sinalaron, explicando que ‘é evidente que a área metropolitana é unha cuestión de cidade e non un asunto parroquial’.

Así mesmo lembran que o alcalde ten pendente recibir á Comisión Permanente da FAVEC desde que o colectivo veciñal o solicitara o pasado 18 de xullo de 2011. ‘Despois de oito meses sen recibirnos é evidente que non hai motivos de axenda. Parece máis ben un problema de covardía de quen desde a prepotencia non está disposto a escoitar opinións diferentes á súa’ denuncian.

Desde ‘Eduardo Chao’ lamentan que o actual goberno municipal insista na súa ofensiva contra o movemento veciñal, nesta ocasión ignorando que a FAVEC é o único interlocutor válido do conxunto das asociacións veciñais para asuntos suprabarriais. ‘Caballero non pode seguir desprezando a unha das entidades sociais máis representativas da cidade, declarada de interese municipal, polo mero feito de que non nos sometamos ás súas posicións partidistas’ concluíron.

Contidos relacionados:

1. O movemento veciñal reivindica unha área metropolitana útil e sen duplicidades para que a lei non quede en ‘papel mollado’
2. A Federación Veciñal ‘plantará’ ao Alcalde no Consello Social da Cidade en protesta pola súa reiterada ‘burla’ ao movemento veciñal
3. A FAVEC esixe ás administracións galega e central que actúen de inmediato para resolver o problema do chumbo na Ría de Vigo.
4. Xabier P. Igrexas, Secretario da FAVEC: «Aquí estamos o movemento veciñal de Vigo, en pé, preparadas e preparados para seguir a camiñar»
5. A FAVEC pídelle ao Alcalde que rectifique as medidas que dificultan o acceso de público aos Plenos.

A aprobación da Lei da Área Metropolitana de Vigo supón para a FAVEC ‘un pequeno logro na medida en que unha reivindicación histórica da cidade chegou ao máximo nivel de debate político’. O movemento veciñal lembra o seu continuado esforzo en favor do proxecto de organizar Vigo e a súa bisbarra nunha área metropolitana propia, e que se exemplifica na exitosa iniciativa lexislativa popular que no seu momento promovera a Federación Veciñal e que contou co apoio do BNG e do PP.

Porén a satisfacción veciñal é moderada xa que entenden este paso como ‘un avanzo moi limitado’. ‘A Área Metropolitana de Vigo non será unha realidade efectiva se non media a vontade activa dos concellos que a compoñen, e iso esixe dun consenso que neste momento non existe’ do contrario afirman ‘a lei aprobada quedará en papel mollado’. Nese senso a Federación Veciñal reitera o chamamento ao ‘diálogo e ao acordo’ entre todos os axentes implicados e lamenta que esta lei non puidese contar co suficiente apoio político.

POR UN ÁREA METROPOLITANA ÚTIL

A FAVEC insiste así mesmo na reivindicación dun área metropolitana ‘verdadeiramente útil para a veciñanza’. En opinión do movemento veciñal a cidadanía o que non quere é ‘un novo esquelete administrativo baleiro de contidos’ senón ao contrario aspira a que o novo ente ‘mellore os servizos públicos que se prestan’. Iso pasa, en opinión da federación, por ‘competencias reais sen duplicidades e que non supoñan un maior custe’.

‘Queremos unha Área Metropolitana que sirva para mellorar a calidade de vida e desenvolvemento de Vigo e a súa área de influencia, non queremos unha nova estrutura burocrática que duplique servizos doutras administracións’ conclúen.

TRANSPORTE METROPOLITANO

Para a Federación Veciñal a primeira prioridade debe ser a creación dun servizo de Transporte Metropolitano público e integral, que se asente na intermodalidade, xa que é a principal demanda social neste eido.

Para o movemento veciñal de Vigo os orzamentos xerais do Estado (OXE) que ven de presentar o goberno central non atenden ás principais necesidades sociais da cidade. A FAVEC lamenta que os OXE para este ano volvan postergar proxectos como a biblioteca do Estado -á que se lle destinan apenas 20.000€ dos 8 millóns que custará construíla-, a ampliación do Centro de Inserción Social ou a nova depuradora.

A respecto da nova EDAR a Federación Veciñal critica con dureza que só se adiquen este ano 4 millóns de euros en lugar dos 58 millóns que acordaran que se asignarían, mediante convenio, a Xunta e o Concello. Feito que pon en perigo que se poida cumprir o prazo fixado (2015) pola Comisión Europea para o saneamento da Ría de Vigo.

No capítulo infraestrutural e de transporte, a FAVEC denuncia que as partidas dos OXE para Vigo non garanten a execución efectiva de ningún dos principais proxectos (nova autovía a Porriño, autovía alternativa Rande ou a nova Estación do AVE). Así mesmo lamentan que o goberno central non destine ‘nin un só euro a mellorar o transporte ferroviario, nin para a conexión de media distancia nin para o necesario tren de proximidade’. Especialmente grave é para ‘Eduardo Chao’ que non se garanta a viabilidade económica da conexión por tren de Vigo e a fronteira portuguesa.

OPOSICIÓN AOS RECORTES ANTISOCIAIS

A Federación Veciñal cualifica de “antisociais” os orzamentos presentados. Critican con dureza os graves recortes en ensino (-21,9%), sanidade (-6,8%) e gasto social (-4,3%), que advirten afectarán á calidade dos servizos públicos que recibe a veciñanza da Vigo. ‘É infame que, coa que está caendo por mor da crise, se recorten servizos esenciais mentres se manteñen gastos improdutivos e se transixe coa fraude fiscal dos máis ricos’ denuncian ao tempo que esixen que ‘alguén tería que explicar porqué se retiran os fondos para a prevención da SIDA e pola contra se segue a financiar a Igrexa Católica’.

DEMANDAN COMPROMISOS EN LUGAR DE PROPAGANDA

Por último a FAVEC esixe do goberno central compromisos efectivos para executar as partidas detinadas a Vigo. ‘Levamos moitos anos asistindo ao mesmo paripé. Anuncios de cifras orzamentadas que logo non se chegan a executar. Proxectos que quedan en propaganda un ano tras outro’ lamentaron. Lembran que en 2011 só se executaron 391 millóns de euros dos 470 millóns presupostados para a provincia de Pontevedra.

Contidos relacionados:

1. FAVEC e sindicatos denuncian que os recortes nas ambulancias do 061 son un ‘atentado á saúde pública’.

A FAVEC estivo representada pola súa Presidenta, María Pérez, o Secretario, Xabier P. Igrexas e máis o vogal de Medio Ambiente, Fran Piñeiro.

A concentración cidadá que tivo lugar no tarde de onte, en réxime de auto-convocatoria, e apoiada entre outras organizacións pola Federación Veciñal, saldouse cun completo éxito de asistencia. Malia que a convocatoria apenas tivo 24h de difusión máis dun milleiro de viguesas e vigueses concentraronse na Porta do Sol reivindicando a defensa do noso monte e reclamando responsabilidades políticas ao goberno galego pola catástrofe das Fragas do Eume ao berro de ‘Lumes NUNCA MÁIS!’.

Desde a FAVEC agradecemos á veciñanza de Vigo  a participación masiva neste acto cívico, que se desenvolveu de xeito pacífico e sen ningún incidente, e no que o movemento veciñal tivo unha importante presenza.

CRÓNICA EN IMAXES 

A seguir publicamos, polo seu interese, a crónica en imaxes do acto publicada polo Secretario da FAVEC, Xabier P. Igrexas, no seu blogue persoal.

Contidos relacionados:

1. O movemento veciñal de Vigo demanda un novo Regulamento de Participación Cidadá e orzamentos participativos na súa festa anual.
2. A FAVEC convoca para vindeiro sábado 26-F unha concentración cidadá contra a suba da luz.

A Federación de Asociacións Veciñais de Vigo “Eduardo Chao” apoia a concentración cidadá convocada para as 20:30h de hoxe na Porta do Sol en protesta pola xestión da catástrofe ambiental que representa o lume nas Fragas do Eume, e fai un chamamento ao conxunto da veciñanza de Vigo a participar da mesma.

O colectivo veciñal súmase deste xeito a numerosas organizacións sociais e ecoloxistas que demandan do goberno galego un outro modelo de xestión do noso patrimonio natural. A FAVEC entende que a ‘prevención’ é a mellor ferramenta para combater o lume, polo que manifesta a súa crítica frontal aos duros recortes nos dispositivos preventivos e de emerxencia nos montes galegos. “O mellor xeito de apagar o lume é evitar que teñan onde prender” explican, ao tempo que amosan a súa incomprensión pola decisión da Xunta de non activar inda o dispositivo de extinción.

A Federación Veciñal critica tamén a política informativa do executivo galego en relación ao que está a suceder nas Fragas do Eume. “A Xunta ten a obriga de ofrecer unha información actualizada e veraz sobre o que acontece cunha peza importante do patrimonio natural de todas e todos os galegos, porén, no que vai de lume o único que ofreceu foi silencio ou falsidades” denuncian ao tempo que esixen que alguén explique “como pode ser que a Xunta siga falando de 750 hectáreas e o propio alcalde da Capela eleve a 1.500 hectáreas a superficie afectada”.

Contidos relacionados:

1. A Federación Veciñal ‘plantará’ ao Alcalde no Consello Social da Cidade en protesta pola súa reiterada ‘burla’ ao movemento veciñal
2. Para a FAVEC o retraso nas listas de espera para operacións evidencia a necesidade urxente dunha decidida aposta pola sanidade pública.
3. Centos de veciñas/os de Vigo, convocados pola FAVEC, concéntranse contra a suba da luz.
4. A FAVEC convoca para vindeiro sábado 26-F unha concentración cidadá contra a suba da luz.