A FAVEC defende que o Concello non pode dar publicidade a empresas privadas que xestionan centros de carácter confesional.
Portada do sitio web da Guía de Centros de Ensino do Concello de Vigo
A FAVEC insta á Concellaría de Educación a que retire da nova edición da guía de centros de ensino, desta volta en forma de directorio web (http://www.escolasvigo.org/) e que se lanzou hoxe, os centros de ensino privado-concertado.
O movemento veciñal defende que nun catálogo público do Concello “non se pode dar publicidade a empresas privadas que xestionan centros de ensino en moitos casos de carácter confesional e cun funcionamento pouco, ou nada, democrático”. A FAVEC entende que a oferta educativa que debe divulgar e promocionar a Concellería de Educación é a dos centros públicos, como se fixo en anteriores edicións da guía.
A Federación Veciñal cualifica esta decisión do departamento que dirixe Raquel Díaz como “francamente inoportuna”, xa que “nun contexto de claro ataque contra dos servizos públicos no canto de valorizar e apostar polo ensino público se lle equipara á oferta privada”. Nese senso a FAVEC reitera a súa aposta firme polo carácter público de servizos esenciais como a sanidade ou o ensino.
Por último lembran á concelleira que o mellor xeito de axudar ao ensino público na cidade é atender as demandas e resolver as necesidades dos centros públicos, moitas delas pendentes.
PDF Contidos relacionados:
